Liberté...

In zour ou désid alé.. . Repran out shemin...repran out liberté kom i di.. .
Pourtan fo pa krwar sat i désid ali plis éré..
Liberté in prison i oblij aou arkonstri aou
Kamarad ièr sra pa sat zordi ni domin riskab...
Dékourajman... inkonpréansiyon... kestionnman..  nora poin limit. ...la nuit... lo zour.
Oblij aou met tout à tér...marsh ni kom in vér..
Sibl lésansiél. ..tanto larm... tango rogré... tango souvan mazinasiyion i fé  dout aou ou mêm... . Out shwa.. lo sans out vi... direksiyon ou la pran
Napwin marsh ariér dan la vi. .. ou avans.. . Ou tomb... ou relév..
Regar domoun... réfleksiyon ou sa antann... ou pa..
Out koko i sa travay ... pourtan nora pwin vérité apark sel néna dan out ker...
Gran gran diskisiyon sobatkoz  ek ou mêm ou sa fé...
Nou lé pa programé pou viv tousel kom Adam ek Eve .
Pou out kaniki dann milié ou gard out kouraz ou  larg pa lo kor.. . Ou tienbo seré ou larg pa...
Alor ou va rod konpani mêm si sé pa touzour lo méyier mé zis pou pa rest tousel.. .
Lo tan in lambians met tout si koté.. .
Profit just linstan prézan.. .
Aprè nora retour réalité... li nora pa boujé
Li va renu ankor plu for....
Lo tan va fé son travay...
Ou va asim out shwa...
La vi i doi kontinié....

Lamour lé dou...

Asoir mon siro amèr i fé giynn amwin mo kèr.
Mon kor san gou ni santiman
I krash in dou venin.
Si kalbass i suiv la rasinn.
Lamour lé dou pa dan mon kaz.
Margoz tro dou koté ou.
Si tamarin vert an rougay lavi.
Piman napi pou lavi an tapenak.
Lamour, konfitir la donn pou koshon.
An boudin mon larm losan i koul.
Lodér brilé in paradi perdi.
Do bwa ver i boukann mon manzé pou lo kèr.
Kom pou tizann amwin ankor.
Si la pa mor, lé pa loin.
La kaz amwin mi dodo pi.
Mon kaz an nik pa moulalé.
Mon ménaz i tonm an chato la sab.
Dolo la mandoz i amport tout.
Lorizon kasé tro lwin pou mwin.
Mon min i karess mon koko.
Lot i sèr mon kèr an doulér.
Pou pa li arèt bat...




 

Trajédi grék!

San voulwar ti ginn ti ginn ou renons.
In pa devan, in dériyèr, dé si koté.
Kom dan in dans an dékadans.
Lo kor, léspri i doviyn mavouz.
Lo rir in pé forsé pou parèt.
Kon in komédiyn dann in trajédi grék.
Zoué ton rol zisko bout, résit out teks .
Shakinn doktér kontr kèr.
In bon konsey, in bon reméd.
Fé sat mi di pa sat mi fé.
La fé la di dann son mazigador.
La oubli mi té pa in sigidèr.
Dann mon bwat lo kor an dé.
Limièr blan pou rido nwar.
Spekatèr i bat la min san komprann.
Aswar promié ou dernié akt...
I dépan kel koté la sènn ou lé.
Dann in dernié kozman...
S'ra biento lèr tir mon révérans.
Sof somanké si néna in rapel...
Kom sat i résof lo kèr i donn anvi zoué ankor.

Fin

San ou atann lo désisiyon i tonm su ou.
Li léss aou san vwa, i bat aou atér.
Ou té lwin maziné sat té sa arivé.
Alor apré lo shok, lémosiyon...
Ou ésay ardress la tèt pou pa noiy aou.
Ou napoin lo shwa i fo lèv la tèt.
I fo avansé...marmay la bezwin aou.
Aou  mèm zot zarboutan...
Aou mèm zot far dann tan syklonn.
In ot zour ou arpas lo film pou komprann
Koman la ariv à là.
Par koman ou la riyn vu sat tout domoun té vwa.
Kom anfermé dan out vi ou la konstri.
Lo zié ni lo kér té vé pa vwar ni antann.
Lé vré té ariv shamay,krosh krosh in pé...
Mé zamé riyn grav dann fon.
Té trouv touzour in manir pou arpran pié.
Mé la zordi kosa la ariv amwin.
San atann, té fini, ou té déjà lwin.
La fini...