2018 monmon!

Fanm ti baba fé aou monmon.
Pa in zour san lo kor i koz ek lo kér.
Lémosiyon tanto dan  in doulér an vwa famiy li la énét.
Dopi zour-là in sél shemin trasé pou galiz somin son vi.
Dann komansman promié traka donn dolé pou fé noué la vi sanm li.
In ti ginn dolé pou bwar si in tété bouzaron lavi.
Rod pa koman i fo trouv manir souaiynn ali.
Malgré malisé souvan défwa... dan la dans i dans.
Sak i viv i batay... in monmon i batay pou fé viv son zazakel.
Kombiyn monmon i sakrifi ael pou sém lavi.
Kombiyn i kashiét pou pléré kan frigidér lé vid.
Kombiyn i lév  avan soley pou alé rod son monay.
Kombiyn malgré in zonm la giynn la zél i soubat ankor.
Kombiyn sou lo kou i tiynbo pou son marmay.
La di La Réniyon sosiété monmoniarkial.
In monmon Zarboutan  famiy, i pli mé kass pa.
Gard pa son fantézi pourvi kaniki néna sat i fo ali.

Monmon i donn tout mèm plis li noré pou partazé.
Dann wi napwin batay, mé dann in monmon néna lamour san kondisiyon.
Tansiyon, pangar, do pré, do lwin, in monmon i gard in zié si son ti bout.
Lo kér in monmon la finn konét avan vwar ou antann sat la pasé ou i sa arivé.
Lo van, la pli, syklonn, la nèz, aou mèm soley dann kér marmay.
I plér, i ri, i tonm, i lèv aou mém lé touzour là.
                             MONMON!
Gayar fét mon monmon ek tout monmon POU IÈR, ZORDI ek DOMIN.

Isi La Réniyon!

Isi La Réniyon, aou Kaf, malbar, yab, zarab, komor...mon dalon!
Isi La Réniyon aou sinwa, maoré, zorey... mon dalon!
Isi La Réniyon tout nasiyon mon dalon, mon fra...
Si ou vé mét ansanm pou mon péï.
Isi La Réniyon nout lang i maiy...
Nou koz kréol, fransé, anglé... nou anvoy tout koméla.
Isi nou fé servis, kaf, malbar, maligasé.
Après sa ni sava la méss
Isi nou pri la moské, aprésa nou partaz la viann.
Isi kok i sant gran mati.
Isi Gramoun i bat domino, i zoué kart sou pié badamié.
Isi nou krwa lespri.
Isi nou soiynn ek tizann, zerbaz.
Isi nou dépoz rmvann dan la krwazé, nou fann larzan pou zako.
Isi nou fé sérémoni malbar, kaf, malgass dann bor la rivière ek la mér.
Isi nout bat tambour...
Isi nou fé sonn la klosh pa riynk légliz.
Isi zarab i apel la priyèr dann minaré pandan kato i shant dann son shapél.
Isi nou port poutou su lo fron.
Isi nou port la krwa dann kou.
Isi i port foular si la tet.
Isi i port kipa.
Isi néna respé pou tout demoun.
Is respé  té là avan nout tout.
Isi La Réniyon in sél pép, pliziér nasiyon.
Isi napwin zansét golwa la aric par bato.
Isi nout batar sité, in fors.
Isi nou vé viv kréolité.
Isi kréolité in lespas pou on memwar konsian nout peup.
Isi sé La Réniyon....Isi sé La Réniyon.!

Zordi mi rèv!

Zordi mi rèv, mi di azot, mon ban sér,mon bann fra, malgré nou dwa fé fass difikilté zordi ek domin.
Mi fé pourtan in rév. Sé in rév profondéman anrasiné  dann réalité Réiyoné.
Mi rév in zour nout nasiyon i éxis par li mém: "Nou néna kom vérité évidan, tout bann zonm té kréé égal é nou lé pa plis mé nou lé sirman pa mwin."
Mi rèv in zour, su nout tér nou giynn asiz an dalonaz otour la tab nou réusit collektif.
Mi rév in zour, La Réniyon, nout péï ousa inzistis ek inégalité sosial i péz anou dopi tro lontan, lé transformé an in terr réusit, zistis ek liberté.
Mi rèv nout marmay i viv in zour dann in péï i donn azot la plas zot i mérit, pou pa zot lé kondané léxil sinon sa viv dann prékarité!
Mi rèv, in zour, tout bann ti fiy, ti garson La Réniyon i ariv donn azot la min san pér domin.
Mi rèv, in zour, tout mon pép lé respekté pou sat li lé: in pép DIGN!
Mi rèv shanjman pou mon pèp.
Mi rèv in nou vi pou mon pèp.
Mi rèv Zordi.... Zordi mi rèv.... Mi RÈV!.....

Teks inspiré "I have a dream".Martin Lutherking.
Ékri é mi an mo pou " Kabari/ Kabar Ousa napwin la zistis na pwin la pé"   soutiyn Anthony ek Clément 12/05/2018.