Domin lao...

Sirman domin ma mont lao gran matin.
Ma alé gard lo siél pli pré.
Ma alé toush zétwal ek madam la linn.
Ma koz ek bondiyé pou zistoir kroyans domoun.
Ma vwar si lao paradi pou vré.
Akoz zordi pa iér ni domin pou mwin.
Ma artrouv famiy ek dalon... voizinaz...
Ma alé rankont fanm... boug la ékri zistwar domounité.
Ma gard in zié si zot... pangar...
Ma pran repo étérnel si lé vré...?
Ma étinn mashin pou pansé dan mon tét..
Ma arét rod komprann kosa tél shoz...
Gran matin nora pi béswin lévé riskab...
Ma plann dann siél kom in zanz.
Mon léspri libéré ma gard in ot manièr mon vi.
Somanké ma kompran, ma trouv la klé gran liv.
Sat i di tout... i délivr... i libér...
Ou alor riskab ma désann dan fon...
Pou bril mon kor dann fé lenfér...
Riskab sat mi té fé bon pa asé komparé mon péshé...
Alor mi poura pa trouv la pé...
Ma paiy pou sat ma la fé ou pa fé...
Ki koné kosa néna kan ou désot baro lavi.
Mon vi ièr... domin... zordi va fini...
Tout fason zot sra pi la pou vwar...
Ma libér zot léspri... plér pa pou mwin domin.
Kom mi démann pa non pli zordi...
Tout isi ba i dwa fini... ek mwin ou san mwin!!
Nartrouv dann fon lenfér ou sinonsa lao ...
Ki koné? Ousa...? kan ? Nou va artouv anou...
NARTROUV ou pa...

Monmon plér pa.

Marmay pokor sort lékol finn domann aou kosa  néna pou  manzé.
Atann aou taleur inkièt pa nora touzour in ti bousé.
Sof koman na démérdé pou shof marmit dési dofé.
Papa pokor rantré la di talér li va pass la boutik.
Marké marké si karné boutik Fransis la fin lo mwa na péiyé.
Si na pwin nalé rod in bouké bred méday lakaz granmèr.
Dégaz aou vitman avan  fénwar i rant.
Pran out kayié aprann lékol in zour ou va giynn sové.
Gouvernman la di anou asisté li vwa pa nout malisé.
Travay napwin, lékol momon pa giynn alé lwin.
Papa napi travay dann la kour Bolié.
Lo rom la pou tié ali é nou ansanm.

Monmon plér pa, monmon plér pa.
Monmon plér pa...aou mèm nout zarboutan.
Monmon plér pa, monmon plér pa.

La pli tonbé la kaz i koul an panié persé.
Mon pié dan lo fo lévé alé lékol.
Sot la ravinn , travers karo kann pran lo bis.
Profésér larg vilin kozman si RMI,
Kan son gro mwa i tonm.
Mi di pa riyn in zour ma sové monmon la di.
Manzé la kantinn ni va serv dé foi.
Zéleksiyon i ariv na giynn in ti kontra.
Mr lo mèr la di li va aranz lakaz anoula.
Néna réniyon talér na alé fé lo ta.
Sharzér lo la amènn lo rom coca samousa.
Bat lamin la di tonton va sov anou.

Monmon plér pa, monmon plér pa.
Monmon plér pa...aou mèm nout zarboutan.
Monmon plér pa, monmon plér pa.

Lo tan la pasé, lékol la sov anou.
La kaz la aranzé ou kontinu peiyé...
Lalkol la tié papa , la pran mon fra...
Granmèr finn alé ma la plant mon mouroung...
Sharzér lo touzour là mé napi kontra.
Lo kot la vil néna liméb panié persé.
Marmay dégaz azot alé apran lékol
Na mèt ansanm kont tout profitér.
Sirman ma mor avan sanzman.
Mé na met ansanm tan i poura.
Pa kapab lé mor san éséiyé.
Fié pa si baton tonton pou désot la ravinn.

Monmon plér pi, monmon plér pi.
Monmon plér pi...anou mèm out zarboutan.
Monmon plér pi, monmon plér pi.

Liberté

Liberté néna son pri...
Tout zour bondiyé mi paiy ali...
La di fo léss alé....
Sat isi ba i dwa fini...
Kan ou lé fidèl ek ou mém...
Ou plér plis ou ri...
Mé sé lo pri la Liberté ...
Liberté néna son pri...
In dézér dan milié in loazis...
Mont out sourir transh papay
Mém kan out kér i séiynn.
Domin kan soley va levé
Pran ali an kado akoz li napwin pri.
Sér out ti zazakel kont out kér...
Ali mém i gard aou an vi.
Liberté napwin pri...
Sinon sél out vi...
Dans zisko bout la nuit...
Demin sé déjà in ot zour...
Romersi bondiyé donn aou la fors...
Lévé pou alé travay...
Komsi tout isi té gayar...
Liberté néna son pri...
Kan tout pansé dan out koko i amaiy.
Léss lovan souflé pou pouss out niaz.
Ou na lo drwa pléré...
Mé ou na pwin lo drwa renonsé...
Liberté néna son pri...
Lo zour ou va trouv lamour...
Ou va prézant out faktir...
Ou va léss aou porté...
Pé import son  konsékans...
Ou néna in sél vi...
Alor profit san zamé rogré...
Partaz lamour zamé larzan...
Liberté émé néna son pri...
Lo pri lavi ou partaz...
Lo pri lavi ou donn...
Lo pri santiman san modérasiyon...
Liberté néna son pri...
Mé lamour lé o désu.
É pou li ou  donn tout...
Liberté néna son pri pou li mi likid tout.
Mi renons fé fo kompromi
San kontrparti mi rod lamour...
Mé pa pou nimport kel pri.
Lo pri lavi sat mi vé viv...
Antié... san limit... mi kont pa.
Pa kestiyon fé samblan...
Mi pran lamour ousa i lé...
Mi sér ali kont mon kér...
Pou pa li sava tro vit...
Mi nouri ali pou fé grandi ali.
Lo zour li va giynn la zél
Mi vé li port amwin dann siél.
Zis lo tan plann pardsu souvnir.
Lo zour ousa mon kor sra mavouz.
Pou rapél amwin kombiyn mi té éré.
Napwin limit pou émé...
Napwin limit dan lo tan ni léspas...
Lo kér i  dédord lamour ziska fé koul mon larm.
Manzé pou lo kér sa mém i nouri mon kor.
Pa grav si mon kor an zosaiy,
si mon kér i bat.
Liberté nora son pri kan lamour va libér amwin  ankor é ankor.