Eskiz mon pardon sat la arivé. Tousala lété pa kalkilé. La arivé sat la arivé. Le tan la passé, limièr dann fon nout zié la étènn kom in bouzi. Sourir dann bor nout lèv la sek kom la pay dann périod sésress. Dofé la pran andan la bril nout lamour an fimé astèr la pou fé plèr nout zié son larm malizé an kaskad. Zamé mi noré maziné noré ariv anou sa. Apré tout santié nou la traversé, lo pié korshé ek ver boutey nou lavé touzour trouv la fors pou avansé ansanm. Mi agard ièr ek tristess mé an mèm tan mi lé fièr sat nou la fé ansanm. Zordi nout kèr i sèr, nout larm i koul kom volkan si falèz i krash son kolèr. Domin nou mazinn pa li sitantelman nou koné pa koman viv inn san lot. Pourtan zordi nou gingn pi mènn nout vi kom nou té vé ansanm. Ou kom moin nou koné sat lavé dann lo kèr inn é lot. Out foli mon foli. Mon lèr tro sérié in larmir kont moin mèm. Angajé dan nout vi kom in kondisiyon pou viv kom nou té vé. Dé montagn i kroiz pa mé dé moun si. Si pré é si loin si la fin mé zamé bien loin kan i fodra pou ti zarlor zié ron. Lavi lé traversé ek shemin i sava dann tout direksiyon. Tombé i fé mal mé mi gard espoir domin shakinn va artrouv la limièr, sourir dan bor son lèv parsk napoin lo shoi pou dé kombatan la vi kom nou. Si lo kèr i vé bat, lèss ali bat, si lo zié i vé pléré lèss ali pléré parsk ali mèm nout shemin kroi ver in ot vi.
