Kel liv pou La Réniyon?

Blé, vér, zonn, rouz... Kel liv pou La Réniyon.
Tou lé zan douz mwa.
Tout gourvernman in nouvo koulér liv.
Toultan i di i sar fé pourtan toultan mém proméss, mém problém.
Toultan i iyèm anou.
Anou mém la fors La France dan tout zoséan.
Toultan mém politik i kour karté bat la min dovan présidan ek minis.
Toultan niabou di azot pran zot responsabilité, mét azot dakor kosa zot i vé fé pou nout ti péï.
Toultan si i avans pa sé pa mwin sé lot.
Toush pa mon térin ma perd larzan.
Toush pa mon rosh pou inn ou alor lot viyn pran si la miènn.
Lot koté i demann rouv la mér pou mwin sharoy pwason.
Toultan i prépar zéleksiyon zamé i fé à fon pou nout pép.
Ti bout ti bout an tapi mandian ti lamp ti lamp.
Alor isi terlà lirzans sosial ékonomik lé la... i atann pou pété.
Pa kapab pran kouraz travay ansanm.
Aval zot légo... dégonf zot zabo kok tro fiér.
Shakinn i ral lo palto son koté.
Pangar son kamarad i pass mié li.
Dopi lo tan afors ral adrwat, à gosh, bato La Réniyon i balot va finir par shaviré.
Mon péï pa mandian... lé pa né ek in kuiyér an lor dan son boush.
Pou fé in manir fé avans La Réniyon nou néna pourtan tout dann nout min.
Nou néna in zarlor nout tér nout péï dan milié loséan Indiyn.
La fors ek lintézans in pép lé paré pou fé.
Zidé i mank pa an takon... an poundiak dan tout koko.
Larzan in fo prétext ankor... i fo savwar pou fé koué avek.
Mé lé vré pa kapab lé mor san ésaiyé.
Solman nou la zamé vi personn  giynn  in kours si i kour karté la min dann rin.
La Réniyon i giynn arpa son kours si tout domoun lé pa inskri pou lo mém.
Larivé lé an fas, néna zobstak mé  si nou pa kapab kour ansanm, donn la min ni sra touzour perdan.