Zékli lamour

Dann milié in nuit, si in lèr in mizik,
Mon lespri i vavang partou.
Lo brui vag la mèr i klak dann mon koko.
In parol kom pou shersh lo mo si lo mo.
Lespri sar loin i arpas lo film ièr.
La min i tranm pou mazinn ékri la vi domin.
Dépitasiyon i ravinn mon kor an traka.
Kom in lanvi laiss alé, renonsé.
Pourtan ou té kroi aou pli for sa.
Ou té finn maziné tout konsékans out désiziyon.
Gozié i sèr in lémosiyon dann in ver tro for.
La fimé i boukann pou sash mové pansé.
Tout i paré tro gran , tro vid, tro kalm.
La lang i tourn 7 foi mé napoin pou kozé.
Marmit lé vid napi manzé pou lokèr.
Nou dé goni vid té tien pi dobout.
Nout kanèt lo zié i évit kroiz ansanm.
Larm i koul an zékli lamour fini.

Kèr bakapan!

Kom si kan mon kèr lé mavouz lanvi mèt lo mo si lo mo té pli for.
Kom si navé poin moiyin ekri ek sourir kan tout té bien.
Plis i fé mal, plis lespri lé tortiré! Plis lo mo i koul  santiman noir si blan.
Kel koulèr? Noir traka? Rouz la ont? Zonn soley pou briyé? Blé la mer ek lo sièl pou èt natirèl? Blan pirté ti baba? Ver la kolèr?
Lo kèr in bakapan i boir tout sat i donn ali ziska moizi i mont dési  pou abouti kom in boubou. Telman mir i fini pété, lo pi i koul ek son mové lodèr.
Lamour in bézér paké? I vann aou son kozman kom parol béni bondié.
Si largamass out larm i sek pa mé out kèr ek out kor i désharm bout par bout.
Détak la lang pou démavouz lo kèr panié persé si shomin lavi.
Brat amoin pou rest dobout an parmi domoun, pou partaz in kari soular dann bordaz in vi malizé.
Mèt in pé mazanbron pou soign in fonnker an boubou la krout lé malizé dékrok ali.
La vi in soso su fé. Véiy ali pou pa bril ali tro vit'!

Dalon pou toultan!

Dalon néna soir komsa mi noré anvi ou lé pa loin pou moin voir aou.
Dalon néna soir komsa ousa out bon kèr i mank amoin.
Dalon néna soir komsa ou out linsousians noré tir amoin in rir transh papay.
Dalon néna soir komsa ou mi noré bezoin aou mèm in gran zourné.
Dalon néna soir komsa mi noré bien refé "le monde" ek ou.
Dalon néna soir komsa ousa out bann ti blag bien plasé noré bien remèt amoin droit.
Dalon néna soir komsa mi gingn pa pran téléfonn pou koz ek ou.
Dalon néna soir komsa ou noré trouv in solisiyon mêm pou fé arèt la pli.
Dalon néna soir komsa dann rosh ou noré tir dolo.
Dalon noré soir komsa avan mi koz ou noré fine lir an moin.
Dalon noré soir komsa ou s'ré plis mon dalon.
Dalon noré soir komsa mi noré oublié pou kosa ma la ni voir aou.
Dalon noré soir komsa mi koné akoz nou lé dalon.
Dalon noré soir komsa ousa ou mank amoin.
Dalon noré soir komsa  dalon lavi s'ré diféran.
Dalon noré soir komsa la nuit s'ré pli kourt.
Dalon noir soir komsa zétoil noré tro briyé.
Dalon noré soir komsa mi noré bien plèr dan out bra.
Dalon noré soir komsa ousa mi rod aou plis ankor.
Dalon noré soir komsa, noré dalon komsa....!

Koman? Akoz?

Oté momon koman mi sar fé pou di aou asoir mon kèr i sègn.
Oté la sèr koman mi sar di di aou prèt amoin out zépol pou plèr déssi.
Oté kouzinn koman mi sar fé pou demann aou rouv gran out bra pou brat amoin.
Oté lo frèr koman  mi sar fé pou di aou anon bat in karé pou fé lo vid.
Oté kouzin koman mi sar fé pou di aou alon an parti ek in bon manzé pou kass lé kui.
Oté tonton koman mi sar fé pou di aou traka mi lé dan.
Oté matant koman mi sar fé pou di aou ma la bezoin in kou min.
Oté dalon koman mi sar fé pou di aou lé pli simpl koz ek ou plito mon famiy.
Oté doktèr koman mi sar fé pou paiy aou pou ékout amoin.
Oté akoz dé foi lé pli fasil koz ek zinkonu plito son prop san.
Oté akoz mon tèt i gingn pa fé sat son kèr i di ali.
Oté akoz parol bondié i pass si nou kom féiy sonz kan nou lé bien.
Oté akoz dan malizé mon prièr i gingn pa di mersi i doman.
Oté akoz la nuit somey i pèz aou mé i ariv pa tènn mazinasiyon dann koko.
Oté akoz nou gingn pa viv simpl, nou komplik tout'.
Oté akoz nou gign pa di mi aim aou tou lé zour.
Oté akoz on diré lé pli fasil sèm lo mal plito lo bien.
Oté akoz tout domoun i kri zot famiy esensièl é pourtan...
Oté akoz lamour i fini touzour par fé mal to ou tar?