Plantèr i gèt la linn koté Lérop.
Péshèr i rant kanot shinoi o por.
Montagn mon péï patrimoinn mondial.
Maloya produi imatérièl Unesco.
Zamé été kabab désidé an pèp lib.
Oblizé touzour demann lotorisasiyon.
Mêm gran minis kostim i pli la ké.
Pa kapab fé dabor pou nou avant kour dérièr lé zot.
Ek sibvansiyon i plèr dérièr tourist pou vann nout péï.
Travayèr i vann son kouraz gro patron, i kri son kamarad asisté.
I voi pa patron sibvantiyoné i pèz ali atèr.
Kri pa tro for sinon néna i atann dérièr la port.
An 4 par 4 nou aval mèm anndan.
Whisky sinon loto pou abouti nout konsians.
Vann, tout i vann, i fo bien viv.
Koméla gramoun i boir lo kou dovan la boutik ek jènn marmay.
Pou in sigarèt i ral lo kont foutor.
Marmay i fé zanfan pou mèt si livré la kaf.
I fo néna troi pou fanm sèl gingn in kaz.
Systèm i pouri domoun kont asistans piblik.
I fé zanfan, i rod in kaz é apré in travay ek Mr lo mèr.
Ni marsh si la tèt, la tèr i tourn a lanvèr.
Ni oubli viv la valèr nout posh.
Mi lé oki mé mi vé voyaz kom mon kamarad.
Kont in ti kontra mi vann mon vot.
La mizèr noir napi zinité i kri aiy phone.
Kozman la boush sal i larg sa dovan marmay.
Ti kaniki ek son bibron rampli coca, lo né i koul.
Pa grav talèr na amènn ali koifé fé son krèt Dimitry.
Pa grav si marmay i ékout pa tan li la manzé la kantinn.
Koz pa si mon zarlor li pa sort ek ou.
Son mové manir sé parsk ou èm pa li.
Ni koul é kapitènn lotèr si la mèr lé mové.
Pourtan foutor nou lé dann lo mèm bato fol.
Ousa banna la finn ral anou komsa.
Kalkil pi nout ti péï koman i lé.
Shakènn i rod son manir pou levé.
Napi respé, napi valèr?
I fo sov sak i rest?
