dimanche 28 mai 2017

Monmon.. Promié...

Promié tété ou kri monmon.
Promié bibron ou rod monmon.
Promié somey dann bra monmon.
Promié popo pou monmon.
Promié ti pa ek monmon.
Promié  Kozé : monmon.
Promié boushé pou monmon.
Promié  paminn fé  pou monmon.
Promié  tonbé plèr ek monmon.
Promié gaté pou monmon.
Promié zié dou ek monmon.
Promié  sékré i di monmon.
Promié  shagrin mersi monmon.
Promié  kou kongn lavi : monmon.
Promié traka travay i rod monmon.
Promié  lamour monmon.
Promié pou lavi: monmon.
Promié pou èm aou : monmon.
Dernié sar touzour la pou ou monmon.
Promié partou toultan: monmon.
Monmon mi èm aou touzour kom dann promié.
Promié, dernié, in sèl ker: monmon.

dimanche 21 mai 2017

Papiyon

Asoir mon pansé lé lejé kom in zel papiyon.
Li dekol pou poz ali koté ou.
Ki koté oulé mi rèv èt.
Kom in papang i plann dann siel
Mi ve fons trap aou dan mon bra.
Ser aou for, mon manzé pou lo ker.
Kom in lonbraz ou shap.
Mi gingn pa kapay aou..
Alor mi tourn mi vir san fin.
Goni vid i tien pa debout.
Piké o vif, ker korshé i sèign.
Malisé, sa té  pa in planaj.
Dann in vol plané latérisaj difisil.
Retour su ter mon dé pat i tranm.
Mi sekouy mon zèl i perd la plim.
Lo vid i  fé plonj amoin.
Résist lo van kontrèr.
Lo pozé i atir amoin ver ou ankor.
Vol! Va! Vi! Mé arvien.

dimanche 14 mai 2017

Ou pe... mé...


Ou pe abit mon pansé...
Mé zamé ou va détrui mon volonté.
Ou pe dout mon sinsérité...
Mé i shanz arpa kisa mi lé.
Ou pe juj amoin su mon laparans...
Mé mon fon kèr i koné son vérité.
Ou pe di sat ou vé...
Mé lé fé lé pli for lo mo.
Ou pe prann amoin de o...
Mé mi gard mon pié su tèr.
Ou pe étènn la limièr...
Mé ma ralim in ti fanal.
Ou pe ashèt sat ou vé...
Mé mon lespri lé san pri.
Ou pe utiliz la fors...
Mé mi larg arpa lokor.
Ou pe anferm amoin...
Mé mon lespri lé lib.
Ou pe kombat amoin..
Mé pe soubat ek ou.
Ou pe... oui ou pe...
Mé mi pe.... ankor... mi pe  ankor...plis!

dimanche 7 mai 2017

Miroir...

Miroir mon bo miroir...
Miroir mon bo miroir ou la di amoin pli for amoin mèm pli bo.
Miroir mon bo miroir na riyn ou mèm i koné lo fon mon kèr.
Miroir mon bo miroir aou i voi kan mi ésui mon dé larm;
Miroir mon bo miroir asoir mi anfil mon pli bo kabay pou fé le tégor.
Miroir mon bo miroir, mont pa tout gard sa sekré ant nou.
Miroir mon bo miroir kombien foi ou la déform mon vérité.
Miroir mon bo miroir mon royom in péi ravazé.
Miroir mon bo miroir fé reflèt mon pli bo sourir.
Miroir  mon bo miroir aou mèm i désid.
Miroir mon bo miroir aou amoin.
Miroir mon bo miroir amoin aou.