dimanche 27 août 2017

Syklonn

Kom in landmin siklonn
Ou fé  lo tour agard déga...
Néna  sat ou té  mazinn...
Néna sat ou voi an promié...
Néna sat ou dékouv tou lé zour...
Néna  sat ou nétoiy vit fé....
Nena sat ek lo tan va arpousé....
Néna sat lé  fouti définitivman....
Néna  sat rienk spésialis i gingn fé  in nafér.
Kom i figir landmin kou van....
Dépitasiyon pou ou arkomans tout....
Konstrui,  plant pi parey pou évit problém...  
Kas ki briz i trap'ra pi ou komsa....
Inn foi mé pa dé foi  mèm  lérér....
Mé la natir pli for mèm....
Shas ali li arpran son ni...
Dann tourbiyon siklonn-là, riyn i résist...
Kan ou atann pa li lè la devan ou...
Li amport aou si in vals à  mil tan...
Out rézon, Out têt,  out kèr i shavir...
Akrosh aou kom ou vé tout i vol...
Lamour i tanpét lavi pou kontinu viv...
Lavi i tanpét lamour pou viv lamour an kontinu...

dimanche 20 août 2017

Apré...

Dann in fénoir mon péron,
Mi lèss la fré angarot amoin
Aforstan lémosiyon mon santiman i transpir.
Lo kèr i fé koul son tro plin
An débordman larm lo zié.
Madam la linn di amoin lo tan.
Di amoin si domin tangaz i sa shavir amoin
Ou si li sa ral pli loin pli for.
Mon kèr i soubat ek son rézon
Pou pa perd pié ek mon réalité.
Napu lo tan pou perd.
Apré ièr zordi.
Apré lapli soley.
Apré larm lo rir.
Apré tristess la joi.
Apré désepoir lespoir.
Apré fénoir lo zour.
Apré la fré, la shalèr.
Apré aou, amoin, anou.
Apré lamour ankor lamour?