OU...

Soley la pa disparèt mé la pli i tonm son plas.
Nuaz i kash pa le sièl li voil zis son koulèr blé.
Lamèr lé pa démonté mé li bat zist bann vag pli for.
Lo van i souf pa pli for mé li avans pli vit labriz.
La nuit i étenn pa lo zour mé zot i suiv inn é lot.
La mor i vol pa la vi mé li kit zis lo kor.
Lo froi i anpèsh pa la shalér dann livèr.
Lanfér si i exis i anpèsh pa kroir somin paradi.  
In malèr zordi i interdi pa in bonèr domin.
In lamour fané i éxis touzour kekpar.
Ou la pa trouv amoin mé nou la trouv anou.
Ou la pa rèv amoin mé ou la rèv anou.
Ou la pa èm amoin mé nou la èm anou.
Ou la pa perd amoin mé nou la perd anou.
Ou la pa plèr amoin mé ou la plèr anou.
Mèm san moin ou s'ra touzour ou.
Moin san ou s'ra pli lo mèm!

Répons!

Répons té la fo zist savoir lir..
Agard ali  kasièt dérièr in sourir...
Brat ali di mi aim aou...
Pa la penn avoir pér domin...
Viv zordi kom si té pou touzour...
Aou, ael, ali,  amoin inn mèm.
Napoin rien i ariv par hazar...
Shoisi out larivé apré ta trouv ton somin...
Shoizi out répons dann out liv lanvi.
Ekri ali ek lank out fonnkèr...
Tan néna respé ou pé kontiniyé...
Larm i koul na son rézon pou ésuiyé.
em aou dabor pou aprann èm lé zot.
Napoin limit dann partaz santiman...
Partaz lamour zamé larzan...
Dérièr lo kor lespri i viv...
Dérièr lo kèr lamour i respir...
Dérièr in silans lo brui out konsians...
Dérièr in voi lo mo out té kour dérièr...
Dovan moin néna out lonbraz...
Dovan moin néna lavi...

Shanz...

Shanz mon mond, shanz mon moun.
Shanz amoin, shanz anou.
Atann pa domin, lo zour sé lo zour.
Tir andan mèt déor...
Pran kom i lé pa pou sat ni voudré.
Pran pasians aprési sak instan...
Pran konsians lo tan...
Ièr la fini, astér sé tout suit!
Agard ek lo kèr fini ek lo zié.
Dann lot néna touzour in bout moin.
Shass mon bann démon pout èt moin.
Napoin vérité san kèr i bat.
Napoin vi san partaz lamour.
Napoin moin san ou.
Napoin nou san prézan posib'.
Ièr, astèr, domin sé in sèl zour.
Anou, aou, amoin sé in sèl moun.
Anou, aou, amoin sé in sél moun pou touzour pou in sèl mond!

Sat i viv...

La di sat i viv sé sat i kombat.
Sat i avans i pran désiziyon.
I mont lo mur priyèr apré priyèr.
Santiman kont santiman lé dir kom lo rosh.
Lo mo in zarm i ash aou an 4.
Lépé i plann si out tèt pou komba final.
In pié atèr i fo ankor soubat ankor ek touzour.
Demin i apartien ni ou ni  moin.
Alor présan in gato la poison san gou ni santiman.
Fé komsi ou la poin anvi renons rien.
Ou voudré arèt lo komba pou gingn soulazman.
Exkiz mon pardon si mi kashièt pou pléré.
Mi mont sat ou vé voir... ièr, zordi...
Mé pou konbien tan ankor simagri-là.
Lèss tonbé out kèr i fé aou la gèr.
Sign la pé kan larm out lam lé tris...
Sé sign ou la finn perd dopi lontan!
Mi lé tro ou bout pou trouv dodo.
Alor mi plann kom in papiyon lanuit...
I rod in somin pou foulkan pou touzour...
Alor sat i mor sé sat la finn perd komba?