Tout désisiyon...

Ou té là asiz dann milié lanuit antrinn mazinn somin ou té fé pass out vi.
Tout désisiyon na son konsékans ek son poi.
Dé foi li péz aou atér ou sinonsa li fé plann aou léjé kom lo van.
Ou koné i fo alé touzour plis dovan,lèv out tèt, arèt gard an ariyèr.... Pourtan....
Pourtan kan lo dout i fé sér out kér,kan traka i amar out lespri...ou pli mé ou vé pa largé.
In takon foi ou la léss plis dé larm koulé akoz demin sirman ou té aspér ou va mié gout plézir pét a rir.
Tout sanzman i fé pér.
Renons in konfor pou in petét, in somanké i fé tranm out lespri kom out kor.
Lo bann konséyér lé pa lo bann péyér...
Alor ou prét out zorey pou akout bana mé ou koné na riynk ou mèm va fé lo shwa.
Alor....
Soméy trap amoin ral  amoin domin dann in rèv.
Akoz zordi i fé fé amoin mové rév.
Alor...
Kan soley s'ra là donn amoin la fors pou lévé.
Kan soley s'ra là shof mon kér pou fé bouyionn mon vi.
Alor...
Kan lovan va souflé anport loin malizé ek li.
Kan lovan s'ra la amènn amoin loin loin mèm.
Alor...
Kan la pli va grenn son shaplé, pri pou moin.
Kan la pli va mouiy amoin li va étenn dofé mon kolér.
Alor...
Kan mon siklonn s'ra finn pasé... kassé brizé... S'ra tan pou arkonstri.
Parsk in zour shass lot...
Parsk inn min lav lot...
Parsk in prété pou in randu...
Parsk inn foi i apel in ot foi...
Parsk in zour i apel domin.

Déli!

Lobjé out dèli sé  desir touzour plis.
Aprann kontant aou sat ou néna in tourman pou ou.
Pourtan ou lé pa conpliké dan out domann.
Ou kour apré lo bonér dann in reshersh san fin.
Ou èm la vi... Sirman in pé tro nafoi.
Alor kom pou in komblaj ou di zamé non.
Alor Ou kour kom pou évit rest ek ou mém!
Lo mank, la pér lo vid i ravinn out lespri.
Pran lé shoz kom zot i vien pa sat ou voudré zot i lé.
Etinn mashinn pou pansé pou jist viv.
Lésansièl lè la dann kré out kèr...
Soiyn ali,nouri ali pou fé pou pouss lanvi lavi.
Sèm lespwar dann siyon somin out vi.
Ali mèm out garanti kont malizé traka.
Tout tonbé i fé mal, i ekorsh aou à vif.
Alor debout! Lo kor va trouv son gérizon ti bout ti bout.
Lo doulér s'ra là, touzour là...
S'ra zamé pli kom avan sirman.
Lamour...shagrin! Shagrin... lamour! Inn i suiv lot kom lo zour... la nuit...!
Dan in dans aou mèm i donn lo tempo.
Trap, brat dans san zamé arété mèm si napi mizik!

Ragoulé!

Ragoulé fé sanblan éxisté?
Ragoulé tou sèl an parmi domoun?
Ragoulé fé kom si?
Ragoulé pans pou lé ot?
Ragoulé èt touzour bien?
Ragoulé tann lamin?
Ragoulé fé lo for?
Ragoulé antann mové nouvèl?

Ragoulé aval mon kolèr?
Ragoulé la kouyonniss demoun?
Ragoulé travay?
Ragoulé dormi?
Ragoulé lévé?
Ragoulé ramass la blag?
Ragoulé sourir?
Ragoulé èt normal?
Ragoulé rest dann moul?
Ragoulé kalkil tout?
Ragoulé mèm manzé?
Ragoulé in mizèr?
Ragoulé asiz?
Ragoulé dobout?
Ragoulé marshé?

Ragoulé kouri?
Ragoulé roulé?
Ragoulé lo tan i pass?
Ragoulé i avans pa?
Ragoulé tout ti pa ti pa?
Ragoulé wati watia?
Ragoulé silans?
Ragoulé dézord?
Ragoulé lord?
Ragoulé di wi?
Ragoulé di non?
Ragoulé somanké?
Ragoulé ièr?
Ragoulé zordi?
Ragoulé domin?
Ragoulé voir amoin?
Ragoulé voir aou?
Ragoulé voir anou?
Ragoulé voir azot?
Ragoulé èt ragoulé?
Ragoulé...

Granmèr!

Mi souvien...
In ti bonbon rébécca aprè lékol...
In ti moné pou mon karné not...
In ti kari poulé fumé apré finn nétoiy out zardin...
In ti boudoir ek Marie Brizard promié lan...
In bouké bred médaiy pou fini lo moi..
In ti morso maniok, kambar o sik..
In ti gato fagoté ek sat navé...
In ti ver coca  glasé...
In ti café la grég...
Dé min banann pou moin ramèn lakaz.
Out shapo pozé dann fotéiy..
Out ti kozman bien plasé...
Out rir kashièt derièr out min..
Out  ti boit koutir ek out dé...
Out rob i shof aou touzour tro...
Out koulér pou kashièt shevé blan..
Out ban pié kapilèr an ran kom solda...
Out voi té apèl amoin "mon zanfan"...
Out linz akroshe si la lign...
Out pié pruno koté la kuizinn...
Out ti kou balié nik pou pouss féiy...
Out ti manir tienbo out sintir dann loto...
Out komba kont la maladi...
Aou out ti boushé manzé...
Aou asiz dan out plian...amoin si péron...
Aou dan out foteiy dann salon ariv in lèr...
Aou out plas réservé si la tab'...

Dernié foi ma la port aou...
Dernié foi ma la tienbo aou for...
Dernié foi ma la pléré...

Kan tout i arèt i rest souvnir...

I remont lo tan an dezord ek tout son wati watia...

Tout i ramènn amoin tanto ver ou.

In zarboutan  pou moin toultan.
Marmay ek papa noël  té kri aou mémé...
Pou nou ou té  nout gran mèr...
Granmèr... Granmèr... Granmèr...!!!