Berséz pou lamour!

Si pré mé si lwin...
Si lwin mé in zour si pré...
Kom indiféran mé  pourtan si troublé.
Kom in not mizik i donn la kadans
Tout i doviyn kom in lévidans..
Dériyèr in rogar mi té vwa out pensé kashièt...
Mi té lir sat té pa di..
Dé zistwar i krwaz kom dé min i karess azot.
Out sourir mon fors.
Kosté sanm ou tout i doviyn pli sinpl...
Sat la vi  i sépar linivèr i réuni.
Out silans in tro gran vid pou mwin.
Out présans in nésésité pou mwin..
Kom in soley dann milié in tan syklonn.
In vwa i koz dan fon mon kér...
Pou di amwin résist pa...
Profit linstan présan pou partaz lamour...
Akoz domin mi koné pa kosa i atann anou.
Inprévu, inpensab', mi shavir, mi dékol.
Noré gou gard lavi lao sanm ou.
Kom in papang i plann dann sièl
Mon dé pié i toush pi atèr...
Lo tan i défil ali, nou perd lèr.
Mi dévré renons aou? Inposib.
Ariv sat na pou arivé mi néna in sèl vi.
Mi dwa pa mé mé di aou kan mèm mon fonnkèr.
Mi iyèm aou lé komsa. Mi iyèm aou!
Si mi té in fonnkézér fransé mi noré di "Je t'aime"
Mi lé zist mwin alor mi iyèm dann in silans.
San fé tro brui mi agard aou de lwin.
Domin in ot zour pe èt ou va rejouènn amwin...
Kisa i koné dan in zour, in semènn, in mwa, 5 an, 10 an, 30 an...
Mon bra touzour ouvér pou brat aou...
Mon lèv va atann pou piouk aou tann dan out kolé.
Mon min va atan sér la vot pou linfini...
Pou lo méyér kom lo pir zamé biyn lwin.
Mon kor va atann pou larg son frison koté ou.
Dann in shanté na déliré zisko bout lanuit...
Ansanm mwin doviyn aou, kom ek ou mi lé zist mwin.
Dann out foli ma noiy awin san modérasiyon.
Kan s'ra lèr na rant lakaz ansanm pou touzour...
Na gard zétwal dan sièl, na ékout in mizik.
Ma fé kui in manzé pou lo kèr...
Sat i soiynn lespri, i mèt lo kor drwat.
Aprésa ma shant pou ou in berséz...
Sat i fé dor aou dann mon bra...
Sat i fé rèv aou, i tir out traka...
Sat i anlèv la fatig, i donn la fwa dann domin.
Si out fardo tro lour pou porté apui si mon zépol.
Mon bra asé for pou port pou nout dé ou.
Mi apartiyn aou, ou apartiyn amwin ansanm.
Akoz nou lé lib lèss lo ker kozé.
Amar mon kér sanm la vot.
Amar la vot sanm la miyènn.
Na kol nout kor ansanm pou la vi.
In zenou atèr baskil pa dériyèr.
Pran mon min é sér ali for pou nou partaz lamour.
JE T'AIME! Mi iyèm aou lé komsa é pa otrman!

Lo drwa di non...

Lo drwa di non...
Apèl ali fuit...
Apèl amwin kaponèr...
Si pou ou viv i fo ou détest amwin...détest.
Si pou ou viv i fo koup lo liyn....Koup.
Pa la pènn jij amwin tro vit...
Pa la pènn fé pass amwin pou lo diab...
Tout bon koté son lanvèr i di...
Alor wi mi néna mon bann défo.
Ma la zamé vann aou lo rèv.
Ou pé resas sa toultan..
Shakinn i fé son film pou son vi.
Mé sé pa komsa lavi i marsh.
Si dann wi napwin batay...
Dan lé dé sans non sé non...
Lo drwa di non... non sé non!

Pa akoz sé non i fé anou zétranzé inn pou lot.

Sat nou la aprésié ièr s'ra ankor là demin.
In kozman i di mié vo et sél plito mal akompaniyé...

Mé mié vo in sél vré dalon plito personn.

Perd pa lo tan kontkér kan na lamour pou fané.

Ièr té ièr, demin va atann son lér.

Zordi lé là viv ali san rogré.

Alo mwin mi di wi wi.... wi pou lavi!

"Rendez-vous" ek mwin mèm.

Pran in "rendez vous" ek ou mèm.
Kosa dalon-là té vé dir amwin.
Kestion là té travay mon lespri
Dann in swar mon solitid té pèz amwin.
Mwin navé sitantelman kestion.
Mé mi té zamé sir lo bann répons.
Par ki koté komansé...
Kosa mi té vé é kel shemin mi té vé prann.
Pa fasil démaiy koz ek konsékans.
Kan lo kor i vé lespri i suiv pa touzour.
Kan lo kèr i renons ousa ou sava.
Ou rest-là ek ou mèm...
Kisa mi lé?... Kosa mi vé?
Mi lé jist in boug an parmi domoun.
Mi demann pa plis ou pe èt tro riskab.
Voulwar tro biyn fé, voulwar fé tout...
Si té sa mon problèm...
Pa posib' fé in sèl shwa.
Pran in "rendez vous" ek ou mèm.
I fodra sirman plis inn pou trouv mon bout...
Tir anndan mèt déor...
Tir fénwar mèt larkansièl...
Souri in kou zist san forsé...
Viv mon gayar san renonsé...
Viv...viv... viv... viv!!

Ièr lé mor...

Ou la donn amwin out vi...
Mwin la donn aou la miènn....
Nou la éshanj nout kèr
Pou fé lo plin lamour...
Kan ou té mavouz mwin la port aou...
Ou la siport amwin pou alé rod domin...
Navé poin limit ant nout dé ou...

Zordi mwin la repran mon vi...
Mwin la repran mon kèr...
Mwin la lèss aou kom san vi....
Si out kèr i sèr kan ou vwa mwin...
La miènn i sèr savwar ou lé mal...
Krwa pa mi lé plis éré...
Mi shersh pu sat mwin la perd...
Mi viv ou alor mi fé kom si....
Rampli lo tan pou kontinu espéré...
Ti baba an poupèt i grandi...
Sa mèm fanal lespoir pou viv...
Pou antann son rir,son kozaman
Mon kèr i bat for pou el.
Alor wi ièr lé mor.
Zordi i batay pou èt.
Domin... domin... mi koné pa... domin!

Lot koté lamour

Lot koté lo mur néna lespwar i demann pou sorti.
Lot koté lo mur néna la vi i atan an bouton.
Deriyèr ti brine in péisaz i kashièt son zoli.
Dann lombraz fey mor la vi i grouiy an poundiak.
Dann in doulér in kér i debord lamour pou versé.
Dann in perlé larm, lo zié i demann pou briyé.
Sou in karess mon po i demann pou giynn frison.
Su bor mon lèv in piouk i atann pou fann larmir.
Dann kré mon min mi atann sér lavot dé pou inn.
Dann mon bra mon ker i demann  bat pou out zorey.
Out janm otour mon rin i atann dans kont out kor an kadans.
Dan out shevé mon dwa i tourn pou tir son foli.
Dann out kou mon souf i pous in dernié soupir.
Dann in shalér nout kor in dernier frison fé dress amwin.
Sou out lang la miyènn i retiyn out kri ankor.
Aprè lamour ankor lamour i atann  pou fé antann son lér.

Santiman étranz....

Santiman étranz ousa ou koné la fin lo film
Pourtan ou vé vwar tout lo bann épizod.
Ou koné i sa mal fini, ou sa pléré.
Malgré sa ou pay out tiké pou vwar.
Out rat pa in lokaziyon tourn lo film...
Ou investi tout sat ou néna kom si ou té sa shanz la fin.
Si linstan ou aprési ou tourn la tèt pou pa antann rézon.
I di Lamour i rann avèg i fé perd la tèt.
Mé ou koné osi  lo kèr i arèt bat i tuyé.
Alor wi i fé mal mé pa kabap lé mor san ésayé.
Esay ankor é ankor lo kèr mèm kabosé i bat ankor.
Ou vé fé konfians lavi ali mèm i désid tout.
Lo biyn, lo mal tout lé pa  blan ou sinonsa nwar.
Dann milié néna in palèt koulèr pou mélanzé.
Pènn out tablo pou désinn out proshin  lorizon.
Tras ek out kréiyon portré inspiré par out Muse.
Riyn lé ékri dann marbr pou léternité.
Mèm lo pli gran stati néna son pwin fébless.
Mèm in zenou atèr tèt anlèr ou fé in priyèr...
Ni pou bondié mé zist pou ou mèm.
Pri pou fé le bon shwa kan lo moman va arivé.
Santiman étranz tanto i pèz aou tanto i fé plann aou.
Santiman étranz tanto i fé mor aou tanto i fé viv aou!