Émansipasiyon

Dann émansipasiyon rod libèr aou mèm de ou mèm.
Mét derièr ou tout atashman i péz aou.
Kan mi koz émansipasiyon pou La Réniyon viyn pa maiy indépandans.
Kan mi koz émansipasiyon viyn pa  fé amwin in lindépandantis.
Mi lé biyn dann valér mon  France mém si li lé mavouz.
Néna sat i di sort pép réiyoné dominasiyon kolonialis, dominadiyon in Républik kolonialis.
Émansipé pou libér kozman... détak la lang.
Émansipé pou libér out pansé, nout manir kréol vwar zafér.
Émansipé pou libér out manir fé an Réiyoné.
Émansip LaRéniyon pou kré la rishess, kréasiyon valér.
Sort dann tout  rapor dominasiyon pou aprann ékout lot ek komprann.
Émansipé pou komprann kisa mi lé, ousa mi sort ousa nou vé alé.
Émansipé pou shakinn i pran son responsabilité pou lavnir La Réniyon.
Kosa nou vé?
Émansipé pou kass la shénn su lo bann rapor fors su bann problèm important nout péï.
Émansipé pou trét bann problèm ek tout sat lé konserné..
Émansipé pou vwar kosa nou lé kapab fé ansanm.
Emansipasiyon pou démavouz konsians pou pran shemin liberté.
Emansipasiyon pou libér anou pép pou libér La Réniyon.

Papa alkolo

Ton  kér, ton kor, ton lespri abouti fé Aou in  alokolo.
Ou la désot la vi san viv an bonom lib plonzé dann in boutey.
Ou la pa giynn ét in papa dan out soulézon.
Regrétan maziné tout sat nou la manké.
An voulawr aou... lontan... riskab... sirman té komsa.
Mé ou té pa tousél pou plonzé...
Sosiété gourvernman lo rhum kolonial la donn aou in bon kou min.
Sosiété dann tan là pa kapab donn lédikasiyon tout marmay.
Sort lékol pou koup kann kom lorizon.
Mantalité pa paré pou ankéss sor la vi.
In kar tipik par si par là pou jér in kolér in mizér ou napwin priz dési.
Sosiété rébiplik kolonial kontini mavouz lo kor, lo kér, lespri bann boug LaRéniyon.
Pou souét bann fét papa boutey lalkol an 4 par 4 partou.
Tout piblisité raménn anou lo zonm di papa dann in vér.
Kom si nout vérité nout bonér i konzig bwar atoué makro.
Dann fon lo boutey na fé ton fét.
Kombiyn bonom pa kapab di non i koul a pik.
Lo rhum, whisky in gou lo fiél i manz kombiyn bonom nout péï.
Kisa i profit lo krim kan batay i pét, i tié dann déga lalkol.
Tié inn, dé, trwa....Tié sét bléss katorz pou la vi.
Serkl dofé dann la paiy kann i bril la vi kombiyn famiy.
Pandan lot koté larzan i koul i sant pou fé la fét si nout do.
Sosiété i fabrik bonom lalkolo pou gard kontrol.
Sosiété lalkol in lantrepriz destriksiyon masif dann in fo lambians.
Donn lalkol, télé, joué mon pép... in krim organisé asisté par komplésans pou gard pouvwar.
Bwar in ti kou sé agréab mé bwar pou giynn lo lou lé pi siportab.
Gayar fét  bann papa mé bwar in pé la rézon zordi.
Adié papa alkolo!

Paradi lanfér LaRéniyon.

La di mon péï in paradi...
Paradi pou agard la natir sirman.
Mé deriyér zimaz kart postal kosa néna.
Lanvér lo dékor lé pa touzour roz.
Sou la sab la plaz kombiyn problém antéré.
Pa akoz demoun i ri inn ek lot la vi lé bél.
Sakénn i port son bertél traka.
Néna sat i batay pou  port son difisil zistwar la  vi.
Sat i ral son gongon la soufrans pou fé viv son famiy.
Sat i soubat kont zespri dann fon in boutey i rod ral ali lot koté lavi.
Sat la maladi la kariyat son kor an doulér.
Sat nou vwa san vwar.
Sat dann in mwa spésialis  problém Laréniyon.
Li néna tout solisiyon, li jij san vréman konét.
Sat  li vwa pa dann bor son fenét lé pa kom sat lot i vwa.
Tout lé pa nwar ni blan... koulér i mank pa dann larkansiél.
Sat i vé... i esaiy... i giynn défwa.
Sat i vé... i ésaiy... i giynn son kou konn, sinonsa son galo.
Sat i renons... avan esaiyé...
Sat la mém pa maziné esaiyé...
Soley i lév lo matin i briy pou tout domoun.
Mé pa tout i profit son limiér parey.
Pa kapab lé mor san ésaiyé.
Alor sat i ésaiy... ankouraz ali.
Alor sat i ésaiy... ésaiy an mod Laréniyon.
Sat i gard... gard mé jij pa san esaiy komprann.
Napwin rézon san dérézon.
Napwin moun i viv san lé zot moun.
Napwin tombé san levé.
Napwin paradi san lanfér.

Akaparér

Akaparér sat i fé violans mon peï, mon tér.
Akaparér sat i fé violans mon pép.
Akaparér sat i fé violans mon lang.
Akaparér sat i fé violans listwar mon nasiyon.
Akaparér sat i kraz patrimwan Laréniyon.
Akaparér sat i réékri listwar mon péï.
Akaparér sat i ve fé pou nou san nou.

Iss mon drapo, mon paviyon.
Iss mon drapo, respekt mon peï.
Iss mon drapo, mon paviyon.
Iss mon drapo, lév mon nasiyon.

Akaparér uniformizasiyon nou vé pa.
Akaparér nout diférans nout lidantité.
Akaparér Laréniyon lé pu out koloni.
Akaparér  Laréniyon pa zanfan batar La Républik.
Akaparér Laréniyon mon kokon.
Akaparér mon tér sé pa out fortunn.
Akaparér la natir va ropran son drwa.

Iss mon drapo, mon paviyon.
Iss mon drapo, respekt mon peï.
Iss mon drapo, mon paviyon.
Iss mon drapo, lév mon nasiyon.

Akaparér Laréniyon dann loséan pa in prizon san baro.
Akaparér kont out reprodiksiyon dominasiyon...
Ni kass la shènn, ni léss la mer bat.
Akaparér mon pép lé pi zanfan soumi.
Akaparér tansiyon dann frustrasiyon batay i pét.
Akaparér ousa napwin la zistis, napwin la pé.
Akaparér ousa napwin réiyoné, napwin réspé.

Iss mon drapo, mon paviyon.
Iss mon drapo, respekt mon peï.
Iss mon drapo, mon paviyon.
Iss mon drapo, lév mon nasiyon.

Akaparér isi ou la pwin out plas.
Akaparér profitér, divizér nou la pa beswin.
Akaparér nout fors nout pép.
Akaparér nout fors la zistis.
Akaparér nou vé viv an pé.
Akaparér in sél pép, in sél nasiyon Laréniyon.

Iss mon drapo, mon paviyon.
Iss mon drapo, respekt mon peï.
Iss mon drapo, mon paviyon.
Iss mon drapo, lév mon nasiyon.
Iss mon drapo, respekt respekt nout listwar.
Iss mon drapo, respekt nout lang.
Iss min drapo, min paviyon.
Iss mon drapo, lév mon nasiyon.