dimanche 26 août 2018

Vol... vol... vol...

Demann pa mwin détr sat mi lé pa.
Demann pa mwin dvenir sat mi s'ra pa.
O péï mon bann rév mi antér mon bann dernié ziluziyon.
Fo savwar perd kan viktwar lé inposibl.
Mé zamé san avwar soubat ansanm.
Mi lé riyn in zonm kom mwin mém.
In zonm ek mon fors é mon féblés.
Mi renons ankor é ankor malgré mwin.
Dann in dernié larm fo tourn la paj.
Si lavi in liv...alor  amwin mém lotér.
Ant mon bann démon é mové shwa.
Sak akt son konsékans ek son pwa.
Ni koupabl ni inosan mi fé mon prosé.
Examin konsians pou esay  arkonstrui amwin.
Rod pu mwin mi lé deja lwin dan mon tét.
Mon zié i koul kan mon kér i séiyn.
Mi rod la min mon zarlor pou rakrosh lavi.
In ti mo, in kozman, pou dékrosh amwin in sourir.
Mi lé pa plis! Mi lé pa mwin!
Si mi lé pu mwin mi lé pi là.
Iér an vol plané ma la bril mon zél...
Zordi ma la plonzé ziska  ramass amwin san fin!
Alor domin ...Vol... vol... vol... ziska lao... lao...lao!


dimanche 19 août 2018

Navé pwin plas...


Navé pwin plas pou ou pourtan navé tan.
In zour plas-là i léss la plas lo vid.
In silans lour pou porté.
La vi i  dwa suiv son shemin.
Tourné... viré... monté... désann...
La vi i fil ti pa ti pa.
Apré in zourné  soley... in nuit zétwal.
I fo kontinié trouv la fors rir.
Linstan prézan i léss la plas souvnir.
Étinn lo mashinn mazinasiyon dann out koko.
Riyn lé ékri par avans dan la vi.
Kom la arivé va parti... pa sur.
Dan in kozé la di "ou lash pa mwin sirtou"
Ousa ou lé mi trouv pu out min...?
La miinn touzour-là pou ou...
Protéz aou... rouv in port pou... sér aou... karess aou... s'ra là...
Pou sat ou ve mi s'ra là... é ou...
Silans... lo tan... i kré distans... touzour mém rofrin.
Shakinn i koné sat néna dann fon son kér.
Shakinn i sém sat li vé dan siyon son vi.
Partaz lamour zamé larzan.
Plis in rofrin in mizik  i donn lo tempo.
Ékout ali san modérasiyon... suiv ali.
Ariv sat néna pou arivé... ni viv in sél fwa.