Kosa fo fé...

Mwin la demann lavi: "Kosa fo fé pou et éré?"
La di amwin léss amwin fé.
Léss koulé sat i dwa alé.
Ékout out kér
É viv touzour san rogré.
Si lo bann shoz i fé pa.
Sé i dwa ét komsa.
Lé té pa pou mwin.
É sirman néna mié i ariv dériyér.
Pli fasil a dir mé pou fé...
Sé in ot zafér.
La vi lé fé komsa...
Napwin riyn lé ékri par avans.
Riyn lé gravé pou touzour dann bazalt.
Sek i viv i batay.
Alor batay pou lavi ou ve mené.
Renons pa out bann prinsip é valér.
Lavi i ashét pa deriyér lo mur in kaz doré.
Lév la têt é souri lavi.
La vi va souri an ou an retour.
Si néna pou douté, pou pléré...
Less aou fé... lo kér i koz léss kozé.
Napwin limit apar lamor.
Lér lamor fo pa sé nou i shwazi ali.
Na riyn aou mém i pé sov aou.
Na riyn aou mém i koné out fonnkér.
Si la vi sé zéprev i donn pou aprann.
Résit out leson ek out kér.
Ali mém shemin out vérité.
Lév la tét é rouv out kér.
Pran sat na pou prann.
É oubli pa donn an retour san modérasiyon.
Sat i donn i reswa... sof koman.
Partaz lamour zamé larzan.

Kozman pou la rout...

Atann pa tro apré sra tro tar.
Tann pa la min, va arash ali.
Ouv pa tro out kér sinon va ékraz ali.
Ekout pa tro domoun sinon ou va  pu antann aou.
Marsh tou sél plito mal akompaniyé.
Rév out zié ouvér pou vwar réalité.
Donn san riyn atann kom retour.
Fiyé pa su baton granpér pou désot la riviér.
Viv ek out bann lanvi pluto lavi lé zot.
Zamé dé san trwa akoz lérér lé kompri dan la piés.
Akoz la pans i soutiyn la trip lespri lo kor mém komba.
Néna zamé in sél répons out bann kestiyon...
Alor asir aou poz aou lo bon kestiyon!
Akoz mazigadoraz lé osi éfémér la rozé gran matin...
Aprési sak linstan pou sak li lé.
Si lér lé si insézisabl lamour...
Alor gard pa li pou ou!
Partaz ali akoz ali mém out respirasiyon.
Konjug ali tout tan ek tout personn.
Ali mém ti fanal i mont shemin pou suiv.
Domin s'ra là sufisaman vit pou pa rat viv zordi.
Si Somanké la rat in lokaziyon...
Riskab va pran la relév!
Mém kan tout i tourn pa ron...
Lo monde i tourn kan mém.
Si soley i dor zamé sé akoz la pli i vey son plas.

Promés!

Nou tiynbo nou larg pa inn é lot.
In proméss fé pou in proméss tenu...?
Néna sat i fé sat zot i di.
É néna sat i di san ariv o bout.
Si mon do lé larj pou port mon fardo.
Li pli kan li port osi sel lé zot.
Kan ma la rod aou ou té pu là.
Kan ou va rod amwin mi s'ra là.
Lé komsa é pa in ot manir.
Le présan i éfas pa lo pasé.
Tout kom fitir i ékri pa o présan.
Ni jijman su iér, zordi ou domin.
Lo meiyér riyn lo méiyér touzour.
Souri lavi pou sov out vi.
Zamé personn va komprann.
Akoz na riyn pou komprann.
Dalon...dalon...dalon... dalon...
Ropran mon min...Mi larg pa la vot.
Apuiy su mo zépol.. kom mwin su la vot.
Na ri ansanm kom avan.
Na dans ansanm kom avan.
Na plér ansanm kom avan.
Na refé lo mond ansanm kom avan.
Na rév ansanm kom avan.
Ansanm kom zamé.

Riyn i dur!

Akoz riyn i dur su la tér.
Santiman i viyn i ar sava
In zour ou lé là.
Landmin ou lé lwin.
Akoz riyn i dur su la tér.
In zour ou plér san ou atann.
Lot ou ri san savwar.
Akoz riyn i dur su la tér.
Fo léss alé sat i sava.
Zordi napwin garanti.
É domin lé pa sir.
Akoz riyn i dur su la tér.
Partaz lamour zamé larzan.
Gard pa rosantiman si out kér.
Akoz riyn i dur su la tér.
I fo relèv la tét.
Mém si pli fasil à dir...
Akoz riyn i dur su la tér.
Ou va remét aou an koz.
Ou va douté lontan lontan.
Akoz riyn i dur su la tér.
Léss lo kér kozé.
Mém la rézon i fé son shemin.
Akoz riyn i dur su la tér.
Dan in zest, in parol.
Souvnir va remont dan out koko.
Akoz riyn i dur su la tér.
In zour tout i fini.
Akoz riyn i dur su la tér.
Tout va arkomansé...

In zourné... in nuit!!

Néna zour komsa apré in nuit tro kourt...
Ou demann aou pou kosa levé.
Ou koné in zourné tro long i atann aou.
Rod in rézon poz in pié atér inn dovan lot.
Lorizon kasé i  briz out motivasiyon.
Pourtan mét ou pli zoli kabay pou la parad.
Sort out pli zoli sourir versiyon in pub colgate.
Kashiét out zié rouzi deriyér in linet pou la poz.
Mém kestiyon pou in mém répons i shap.
Koman i lé? Lé la! Sa va!
Pa le tan mé ou kom mwin pa sir anvi antann mon fonnker.
Kom in komédiyn ni zoué nout rol.
Tanto marionét... nou fé lo pantin pou détourn latansiyon.
Révey aou... grouiyj out kalbass...
Dann lajitasiyon la foul tout i pass... i fonn dan la mass...
Léss pa ou alé....mé pou alé ousa...
Kan tout shemin i raménn aou mém plas.
Touzour fas aou mém dovan out mirwar.
 Lo film napwin touzour inn fin éré.
Alor ou lév pi pou ou mé pou sat i kont si ou.
Fé kom si ou té gayar kontan ét là.
Alor Out koné out dedan lé manzé par in ver lo dout san fin.
Kombiyn tan ou va tenir ankor...?
Lo tan lo kor i siport out lespri?
La nuit dan in dernié rév ou la révé pi levé.
Dann in santiman égoïss pou fini ek sa.
Mém sa ou na pwin lo drwa...
Néna zour komsa apré in zourné  tro long!