FANM/ MONMON

FANM!

In zour la apèl aou ti bababa, ti bishik...

In zour la apèl aou ti fiy...
In zour la apèl aou Manzel...
In zour la apèl aou Madam...
In zour ou la ni sèr...
In zour ou la ni kouzinn...
In Zour ou la ni matant...
In zour ou la ni marènn...
In zour ou la ni in dalonn...
In zour ou la ni in lamourèz....
In zour ou va nir petèt momon...
In zour ou va nir petèt gran mèr, mami....
Mé dopi touzour ou konstrui out vi pou nir FANM.

FANM dann lakaz, FANM dann travay aou: FANM!
FANM isi, FANM laba: FANM!
FANM kabalèr, FANM libéré: FANM!
FANM sèl, FANM vèv: FANM!
FANM dobout, FANM respekté: FANM!
FANM ièr, FANM domin, FANM toultan: FANM!
FANM in zour, FANM tou lé zour: FANM!

MONMON

Momon in sél ker pou nou marmay.
Momon aou mèm zarboutan nout vi.
Momon out vi an sakrifiss ou la fé pou nou.
Momon kombien foi ou la pass dovan.
Momon kosa ou la pa fé pou bien diriz anou.
Momon si ou té pa la kosa nou noré fé.
Momon dann out malèr épouz ou la esay fé bonèr out zenfan.
Momon ti zanfan ti pènn gran zenfan gran traka.
Momon voir aou ri in plézir pou moin.
Momon moin nora zamé asé romersi aou.
Momon dan out zié sé nout vi i défil.
Momon aou mèm nout zarlor.
Momon kan ou plèr mon kèr i sèr.
Momon kan out kèr i ral problèm lé pa loin.
Momon ma pa bezoin kozé ou koné.
Momon lé vré nou ambrass pa nou.
Momon lé vré ni koné pa di "mi aim aou".
Momon nou la pa aprann fé kalin mé jest' lamour té pli for.
Momon san ou la vi noré pa été parey.
Momon in zour, momon toultan!