Paradi lanfér LaRéniyon.

La di mon péï in paradi...
Paradi pou agard la natir sirman.
Mé deriyér zimaz kart postal kosa néna.
Lanvér lo dékor lé pa touzour roz.
Sou la sab la plaz kombiyn problém antéré.
Pa akoz demoun i ri inn ek lot la vi lé bél.
Sakénn i port son bertél traka.
Néna sat i batay pou  port son difisil zistwar la  vi.
Sat i ral son gongon la soufrans pou fé viv son famiy.
Sat i soubat kont zespri dann fon in boutey i rod ral ali lot koté lavi.
Sat la maladi la kariyat son kor an doulér.
Sat nou vwa san vwar.
Sat dann in mwa spésialis  problém Laréniyon.
Li néna tout solisiyon, li jij san vréman konét.
Sat  li vwa pa dann bor son fenét lé pa kom sat lot i vwa.
Tout lé pa nwar ni blan... koulér i mank pa dann larkansiél.
Sat i vé... i esaiy... i giynn défwa.
Sat i vé... i ésaiy... i giynn son kou konn, sinonsa son galo.
Sat i renons... avan esaiyé...
Sat la mém pa maziné esaiyé...
Soley i lév lo matin i briy pou tout domoun.
Mé pa tout i profit son limiér parey.
Pa kapab lé mor san ésaiyé.
Alor sat i ésaiy... ankouraz ali.
Alor sat i ésaiy... ésaiy an mod Laréniyon.
Sat i gard... gard mé jij pa san esaiy komprann.
Napwin rézon san dérézon.
Napwin moun i viv san lé zot moun.
Napwin tombé san levé.
Napwin paradi san lanfér.