Lèss amoin alé....

Lèss amoin alé lot koté miroir...
Mon stylo lé paré pou ékri in nouvo shapit...
Ral pa moin dériyèr ankor é ankor..
Sirman rien s'ra zamé pi parey..
Sirman mi sar gingn kou kongn ...
Mé lèss amoin alé voir lot koté...
Lo vid i fé pèr mé lo promié pa pli difisil...
Kom in robo i fo avansé touzour pou rest vivan...
Gard in kou zié si rétro pou pa oubli lo pasé..
Mé la rout' dovan lé ankor pli importan...
Dann kroizé shemin tout direksiyon lé posib'...
Mé marsh arièr lé interdi..

Alé  à gosh, à droit', droit' dovan mé avans...
Alé pli loin avan voir si  néna pou fé demitour.
Dan lo vid i trouv plito kestiyon...
Tout répons lé zamé définitif...
Kan nora pou pléré, plèr!
Kan nora pou rir, ri!
Kan nora pou émé, èm.

Mié vo soufrir akoz lamour plito soufrir san zamé émé.

Pou in kozman...

Pou in kozman in pé i voudré anjol amoin.
Mé parsk mon kozé mon zarm,
Mon stilo, in savoir kont sat i oubli ki koté zot zombriy té koupé.
Ma desann dann fon lilèt manz maniok, patat apré lékol.
Ma mont  dann bourbié rod in tigazon lakaz matant. 
Parsk dann mon malisé, domoun la ni mèt la min ansanm.
Parsk dann fon mon mémoir gran mèr té di:" fransh vérité"!
Mi tienbo mi larg pa lo fil mon komba.
Mon liberté ékri rampar kont profitèr.
Mon napoin lapèr, mi néna in plin konsians.
Mi apèl pa Adekalom.
Amoin mèm B.R.
Dofé dann kann son konsey.
Mi réfiz rant dann ron krèv la boush ouvér.
Ma amènn mon zanimo dovan tribinal.
Na poin dé galé dann mon min mé in klavié.
Gèt mon kozé fransé fé mont zamal dé troi
Dési la tèr St- Benoît Bolié, mon rasinn.
Mon parol gongon lasoufrans pou dé troi maloki?
Mon fizi i tir lo mo pou servis réiyoné.
Mon lang napoin lo zo i bouz ankor.
Laviyon léta fransé zèl papang va manz mon fraz?
Banm kalou banm! Banm kalou banm!
Anon...

Fé rir amoin!!

Fé rir amoin , fé rir amoin...
Fé rir amoin an transh papay.
Fé rir amoin pou gingn mal o vant.
Fé rir amoin ek out kouyonis.
Fé rir amoin ek out rir.
Fé rir amoin ek out zié la malis.
Fé rir amoin ek out kozamn la blag.
Fé rir amoin ek out parol foutan bien plasé.
Fé rir amoin ek out bann desin.
Fé rir amoin ek out bann zidé bizar.
Fé rir amoin ek out dégizman karnaval.
Fé rir amoin ek out ban vié foto.
Fé rir amoin ek out pat gosh.
Fé rir amoin ek out bann surpriz.
Fé rir amoin ek out bann karess.
Fé rir amoin ek out bann giligili.
Fé rir amoin ek out kèr.
Fé rir amoin, mi AMUZ!
Fé rir amoin matin, midi, soir.
Fé rir amoin,  fé rir amoin,  fé rir amoin, fé  rir amoin ankor ek touzour... 

Si mi mor..

Si mi mor sé pars rien lé éternèl...
Si mi mor véiy  dofé sou marmit..
Si mi mor partaz in gazon pou moin..
Si mi mor boir in kou pou moin...
Si mi mor koup gato mon plas...
Si mi mor kraz in maloya pou moin...
Si mi mor shant in pé pou moin..
Si mi mor zoué in pé domino pou moin..
Si mi mor fé koul in  ti kafé pou moin... 
Si mi mor voiyaz in pé pou moin..
Si mi mor lèss la lang bat...

Si mi mor gaspi pa larzan dann serkeiy...
Si mi mor ambrass amoin in kou...
Si mi mor véiy si mon ti zarlor...
Si mi mor fé kado mon kor..
Si mi mor mi fé kado azot mon vi..
Si mi mor kontiniyé batay pou lessensiyèl...
Si mi mor oubli pa moin tro vit'..
Si mi  mor brat azot pou èm azot...
Si mi mor véiy inn si lot...
Si mi mor mi s'ra zamé bien loin...
Si mi mor ma kontiniyé véiy si zot...
Si mi mor oubli pa mi té èm azot...
Si mi mor plèr pa tro, lèss shagrin alé...
Si mi mor mazinn domin gard pi dériyèr...
Si mi mor lèss la vi viv ankor...
Si mi mor...  lo pli tar possib'

Dodo.....

Néna zour komsa i vo mié éténn tout.
Ekout pa out kèr, out rézon sinonsa out dérézon.
Kom in kabay tro larz pou ou.
Tanto dan out vi ou flot, tanto ou koul , tanto ou dékol.
Niabou frot', frot' out koko ek out dé min.
Out pansé i dovien pa pli klér ni i éfas.
Napoin rien i ralim ti fanal dan fon out zié.
Ziska out dé larm i vé pi koulé.
Ou voudré kronm la vi mé kom si on diré out dan lé tro tann.
San gou ni santiman ou aval zour é nuit'.
Ou gard dovan pou esaiy atrap domin.
Li fil ant out doi kom in limièr soley.
I fo mié la pli i tonm for pou ratrap somey.
Linstan ral in karang mazinasiyon i rèv tousèl
San ou dan in bordaz in li tro gran.
Mi rèv in dodo kom ti baba tann.
Mi rèv, mi rèv, mi rèv...