Kan lo mo i maiy
Ou rant dan mon tèt
Kom in karès i pe fé lèv frison si in po
Alor dann oui napoin batay.
Alor out pansé i déplas frontièr in réfléksiyon.
Napoin limit sinon sat mi té pe maziné.
Dann in kozé pou in sobatkoz
Lo mo i trok inn pou inn.
Tourné viré mi shanz pozisiyon.
Ni arfé lo mond mé ni shanz pa domoun.
Si ou lé sat ou lé.
Mi lé pa par degré.
Alor oui ni fé sat nou défé.
Alon fé sat nou té pou di.
Pars lo mo pou lo mo napoin sans.
Koz kozé mon lang napoin lozo.
Mon laksiyon néna touzour son refléksiyon.
Alon lèss la lang kozé.
Aucun commentaire:
Enregistrer un commentaire