Klik jèm an partaz zist pou lo zié domoun.
Ranpli, ranpli! Ranpli!! Mi kashièt derièr mon kabay.
Sou mon shapo an zizit mazinn pa traka mon koko.
Misié an kravat pou détourn lo zié agard lot koté.
Dériyèr mon kanèt lo zié ni malis ni mèm in suplis.
Mon kèr in kour zerb tro gran pou zoué la boul.
Dépay! Dépayié! In travay san fin pou sèm lamour.
Si bor mon lèv, in sourir i fé apèl ali désiré.
Kat ti mo biyn plasé pou mésié madam la sosiété.
Napwin zour san limièr, ni nuit tro long san somey.
Napwin rézon domin i ariviyn pa sou in nouvo zour.
Alor mi sér lo pwin, mi rant dan ron. Batay ankor pou viv.
Mi kri , mi shant kom pou sigid in lespri mavouzé.
Kom Sitarane mi pass partout pou rouv in port, in fénèt.
Mi ramass, mi ékout dan silans tout sort kozman.
Mi donn la min, zis pou kontinié viv, zis existé.
In ti gazon lespwar nouri mon kor kass papay san golèt.
Li pli, li afébli ma zamé li vé largé. Zamé!
Dann fénoir mon kaz lo kalm i ajit mon majinasiyon.
Ti zazakel i mank amwin pou fé résonn son vwa.
In ti braté pou fann in shagrin va alé kom la arivé.
Partaz lamour zamé larzan, sa mèm manzé pou lo kér.
Dann in panié ranpli lémosiyon mi esay fé lo tri.
In zour i apèl domin, sak zour i sufi son pènn.
Soley i lèv, i lèv pou tout domoun alors lèv la tèt.
Avans, avans, avans ankor pou ambrass domin! San fin!
Mi Klik, klik, klik, jèm ankor é touzour su la vi! KLIK! KLIK!
