Pou toultan!

Lo tan ou la demann amwin:
Mi napwin ou mi na pu.
Sirman sat i vé i giynn.
Sat i rod i trouv.
Mé lo tan i éshap amwin.
Pourtan mi tourn an ron kom in shiyn dann in roswar.
Lotan pou mwin mi napwin.
Zégiy i défil i kour lwin.
Imposib ratrap lo tan perdi.
Dovan, dériyèr... i remont pa lo tan.
Tanpi pou mwin...léss koulé.
Ant ièr, zordi , domin
Tanzantan mi mazin pourtan
Kosa noré doné dann tan là.
Lo tan in kozé...
Lo tan in piouk... piouké...
Lo tan in kou zié...
Lo tan in karess...
Lo tan èm aou..
Lo tan èm anou...
Si avan lèr sé pa lér....
Apré lér sé pu lèr...
Lo tan i soiyn blésir...
Mé sikatris i rest là...
Pou toultan!