Laréniyon.... Mon fanm!

Atoué mém kom mon fanm...Atoué mém La Réniyon...
Sitantelman sak fwa mi agard aou in lémosiyon i fé frisonn mon kor.
Mi mazinn tout zistwar ou la viv ek tout sat nou néna ankor pou viv.
Dann fon mon koko mi mazinn koman fé pou gard aou pou mwin.
Tanto ou fé rir amwin, tanto ou fé plér amwin.
Mé sé pou ou mi s'ra pré fé foli mon kor.
Si i toush aou, i rod fé aou mal mon zamal va monté.
Si i fo mi kit aou...vitman mi éfass pansé là.
Pran distans sanm touzour in traka dann mon fonn kér.
Napwin dé kom ou si la tér kapab fé sat ou la fé.
Dann bor lamér ziska lao dann kap piton ma suiv aou.
Ou briy anparmi domoun si la tér kom véli dann siél.
Si lo bor out zépol ou port traka tro lour pou ou.
Ou pli mé ou kass pa.
Kom soley ou kashiét deriyér niaz pou vers out larm.
Lé vré mi iyém aou mém si difisil amont sa aou toultan.
Kom  bann rivièr i koul an kaskad ou ravinn mon kor an dévénn.
Ou nouri mon kor, mon lespri pou fé bat mon kér.
Malgré out kor kaskasé kom ou di out zoli mi vwa.
Out linperfeksiyon sanm lé miénn... inn min lav lot.
Napwin zour ma la pa anvi sér aou dan mon bra pou di aou désolé... pardon... mersi... mi iyém aou pou tout sat ou lé pou mwin.
Kado bondié la mét amwin koté ou pou viv.
Kan mi s'ra pi la dot va pran zot prékosiyon pou véiy si ou.
Mi espér zot va iyém aou kom mwin.
Aou Laréniyon kom mon fanm mi iyém aou pou toultan.