Météo fonnkèr!

Lapli i tonm i vers son lémosiyon si moin.
I fé koul santiman si mon kor.
In farinn  i fann  in pousièr lo dout.
In gout i perl kom in larm si mon figir.
In bezman lapli i fé débord kolèr dann fon mon kèr,
Kan in ti brinn  i soulaz mon shalér.
Lo van i souf i kapot mon koko dovan dériyèr,
Kan soley i pers niaz kom santiman i fé lèv amoin.
Si soley i shof,
Si lo van i shavir,
Si la pli i tonm,
Santiman i bord lo tan.
Tanto ou ri,
Tanto ou trakass,
Tanto ou plèr,
Mé dan tout tanto aim lavi.
Trakass, plèr, ri lé komsa.
Batay pou lavi mé lit pa  kont out santiman.
Laiss ali sorti, laiss ali fé son vi.