IN LANGAZMAN POU MON PEÏ !

Soumisiyon dann prékarité sa mèm soufrans mon pèp.

La tir son lavnir dan son min pou mié piétinn son présan.

Kom i voudré anfons anou i donn anou dann modernité pou voir, pou révé.

Mé i lèss anou dann in bidon-lavil i koul an panié persé.

Nout kor an luil sa mèm siro pou sat i vé control mon pèp.

Plis nou lé atèr : plis li lé anlèr plis li plish anou !

In langazman pou di marmay lé pa kondané asiz dovan in boutik...

Ou supli in boug politik pou in ti kontra pou in vi bankal.

In langazman pou di nou lé pa kondané anvoy tout marmay ek in pé linstriksion dan peï gouyav déor.

In langazman pou fé in gran plas pou li, pou li fé soutien famiy son pèp lé mavouz.

Tout sat lé bon anvoy déor ! Sat lé malad soiyn pa li !

Sat lé bon i vé rest terlà arèt pèz ali atèr ! Foutor !

Asé bon pou viv partou su la tèr.Mé pa asé bon pou viv é dévlop son péi.

Sufizaman malad pou port anlèr in bann profitèr (profit’ mon tèr).

In langazman pou remèt lespoir dann zié kréol !

In langazman pou éfass anprint' résignasiyon dann son min !

In langazman pou ardonn volonté kroir in ot destiné lé posib’!

In langazman pou mazinn an réiyoné é konstrui in manir viv an réiyoné.

Mon gongon la soufrans mon pèp i renons !

Mon gongon lespoir kan réiyoné i vé exis par li mèm !!

I di téori gran shanjman i gèt si Gillot...

Pandan ou agard marmay anbarké pou déor...

Arèt rouv lo bra pou kolié flér pou Jean Marine...

Pa kabab batay solidér pou zot marmay ! 

Mé té kapab mèt dofé lo san pou in télé..

Kapab koz dann tant an zourné si in radio...

Kontinié bat la min pou misié lo mèr...

Pandan s'tan là kabri kontinié manz salad...kabri kontinié manz salad...

Kontinié bat la min présidan réziyon...biyé lavion kom ti pin pou alé gard marmay lot koté lamèr...

Kontinié bat la min tati va okip laras nout gramoun dan son kaz... ?

Sosiété vol an lèr anterman promièr klas pou son pèp...

In langazman fé pout out péï kansa... ?

Kan ou néna pou gagné ?

Kansa ou arèt fié si baton gran pèr pou avans par ou mèm!

In langazman fé pou out péï kansa...

Kan tout nout marmay nora finn désot lamèr...

Kan si la tèr ou lé né ou gingn arpi kozé...

Kan va fé in résérv Kréol i dans maloya pou Unesco ;

In langazman fé pou out péi kansa... ?

Kan tout domoun va di ali osi réiyoné... In moin , in an, li vienn rantré ali osi réiyoné pa kapab koz in mo kréol ali osi réyoné akoz li manz kari volay?

In langazman fé pou out péï kansa... ?

Kan s'ra tro tar...

Kan kok i sant arpi, kan i batay arpi dann ron ?

Kan tambour malbar ...kaf... fé arpi dézord dann servis.

In langazman fé pou out péï kansa... ?

Kan nora pi lo droi rod la pay pou zanimo...

Kan tout pwason s'ra dann lakariom sin zil ?

Kan nout tisann s'ra rienk an boit laboutik lékler !

In langazman pou fé pou out péi kan Laréniyon s'ra an Frans ?

In langazman pou out péi kan ou s'ra mor ?

MON LANGAZMAN MON PEI : Fé 20 désanm tout lané ! LIBERTE !

Mon langazman mon péi : 52 SEMINN AN KREOL !

Mon langazman mon péï : AMOIN!

In langazman mon péï 2017 teks réfé pou Rant Dann Ron évènman BISIK semenn Kréol 28 oktob 2017 si Sin Benwa  dann ron koq.