Mon péï Bato fol!

Mon péï bato fol, nout péï bato fol.
Pa in zour san larm versé.
Pa in zour san rézon explozé.
Larm lo san i koul pou in zanfan.
Dépitasiyon si gramoun malisé voir restan son vi travay.
Lo kèr gro in famiy agard son zenfan anbarké.
Lo gou lo fièl in rom i ravaz lavi.
Kombien i voi somaz  gangrènn ali.
Lo kor, lespri an gongon soufrans.
Kombien i kashièt pou pléré.
Mon péï bato fol, nout péï bato fol.
Famiy dernié zarboutan i éklit bout par bout.
Maladi bondié i amar nout kor.
La di nou lé lib alé dann mond antié.
Mé kansa ni artourn nout péï.
Kansa ni fé pou nout pèp avan fé pou lé "autres".
Agard pa moin an pitié di mi lé pa ouver.
Ziskakan ni rouv mèm, nou aval tout.
Ièr la di léta fransé va sov anou misèr kom Mada, Comores.
Zordi létat Erope va sov anou misèr kom Mada, Comores.
Ziskakan va vann la misèr pou akaparér i shersh pié atèr.
Mon péï bato fol, nout péï bato fol.
Alor ni plèr nout marmay, nout famiy mor.
Alor ni plèr nout travay i soiynn pa nou.
Alor nou plèr nout péï kondané subi soufrans.
Plis mi lèv plis i bord amoin dann in koin...
Ziskakan mon péï bato fol, ziskan nout péï bato fol.

Ziskakan... Vol mon péï!Ziskakan... vol nout péï!
Ziskakan nou plér...