Kozman ek mon lang!

Kozman ant mon Lang(L) é Mwin (M)

M: Koman i lé?
L: Lé la... dousman dousman! Santé Gramoun! Aou mém ?
-I fé alé...
-Akoz riyn "i fé alé". Ou néna traka?
-Traka ou koné koman i lé i viyn i arsava... tout problém i trouv son solisoyon.
-Ben alor... akoz on diré ou néna in tét malisé?
-Mi néna in nafér pou domann aou mé mi koné pa tro koman demann aou sa!
-Ou na la boush... koz!
-Sominn si navé in sominn kréol pou mét aou anlér... navé sobatkoz... Fonnkér... konférans si zotér i ékri kréol... kabar... rakontaz zistwar...rézilta konkour Lang kréol...  in ta ek in bon pé paké zafér pou fét aou... mé mi koné pa... ou koné domoun i koz, néna sat i vant out gayar mé néna in bon pé i malparl si ou do...
-I malparl si mwin akoz ou fé aou malizé pou sa? Lé zantiy ou pran in ka sat i di si mwin mé i fo pa.
-Koz pa komsa mon Lang! Bana i mank aou respé é mwin mi ém pa sa... i fé mal amwin dan mon plié kér.
-Mi sa di aou in zafér mi lé abitué ek sa. Dopi mi lé né... lé komsa... dopi avan mém... mwin na labitid i kraz amwin... i tap si mon do... i mét tout  fot si mwin... mé sék i  viv i batay... dopi mi lé né mi batay... parlfét mi viv... Mi lé kom mon pép toultan ma batay pou viv. Mi giynn pa fé in ot travay... si mi arét mi mor!
-Bonpe la bat la lang sominn si pou di i serv pa riyn kréol, sé in lang lé pa itil pou trouv travay... néna zabo i gonf kan la aprann i sa fé in lagrégasiyon pou zarmontrér  kréol...
-Bonpé osi la bat la lang pou nout gayar...Alor inkiét pa dalon sa kozman domoun i koné pa kosa zot la pou di... néna in takon domoun pou ran azot intérésan i koz pou vé vann ou fé lo buzz pou koz langaz kominikasiyon sosiété 2.0!
-Wi... mé...
-Napwin wi mé...  kom ma la antandu dir fé jist lo ti pa si koté é agard tout sat mwin la finn pasé...  ek tout sat mwin la pran kom kou, prosé dintansiyon na lontan mi té dwa ét mor é antéré mé mi lé touzour-là... Kosa ou kas la tét? Si ou néna in léxistans mi exis  é mi lé itil! Tan mon pép i éxis mi larg pa. La lang napwin lo zo... léss bat...