Kabay an Réniyoné

Lindi si bor shemin zilé préteks pou amont son malizé.
Gourvernman i fé zorey koshon dann marmit pwa.
Pou promié répons anvoy la lwa pou dréss nout kot.
Néna sat la réponn kou galé, néna sat i sant marséyéz.
Problém an takon, an poundiak i débord si la rout.
Zélu i zoué infiltrasiton an misouk pou kass lo kolér pou gard kontrol.
Miniss i viyn vann son kozman léta nasiyon dann son koulér blé.
Li ékout mé li antan pa inn tiork.
Fé sanblan dékouv problém é di li travay.
Dé trwa lanons kom la rozé si feiy sonz i sifi pa pou étinn dofé, ni fé kui manzé dann lakaz.
Néna dolo dann gaz ant gouvernman é mon pép.
Bonpé i kri ékonomi mé personn i kri domounité.
Dopi kan la vi domoun mwin importan larzan.
Ziskakan gran patron éxplwat travayér, retrété, shomér.
Ziskakan i  paiy, i dévers larzan i profit pa tout domoun.
Wi, lé ziska bo in pép i debout ansanm.
Lé dir, lé pa fasil mét ansanm pou trouv manir koz ansanm traka Laréniyon.
Kisa i profit lo krim divisiyon? Touzour sat i gouvern.
Ti bout, ti bout, tanto dann la limiér, tanto dann fénwar bonpé i travay pou mét an mo kosa nout péï la besoiyn.
Minis la parti, kolér la pa fané.
Na lontan personn i krwa pi list papa Noël.
Sou zilé zonn i bourzonn ékri in nouvo prozé  sosiété pou LaRéniyon.
Kabay pou in Réniyon solidér dann son prop modél dévlopman.
Ni kopié kolé rod in manir fé ali an Réniyoné.
Ti pa ti pa na arivé.
Shomin la lit' sa lé long.
Sek i viv, sé sék i batay.