Zilé pou mon pép! (Parti 1)

Sitantelman mon péï, mon pép té kontrolé.
Zot la pran zot tan pou  désann dann shemin pou di zot lé ragoulé subi.
Dann in kabay zilé zonn, péï déor, péï monmon patri.
In gout lésans tro shér la alim dofé.
La mésh té long mé la fini par pété.
Domoun an solda dann in barikad si ron pwin i ménn la révolt.
Manzé tro shér... zimpo pi kapab péiyé... travayér mal péiyé, retrété maltrété, shomér dann malisé, ti patron pri à la gorz ek sharz i péz si son portmoné...
Lo vant lé vid 15 lo mwa, sintir na pi lo tro pou séré.
Lo boubou kariaté i giyn pi soiyné.
Bann zélu politikér  profitér porté disparu kan son pép i kri asé.
I Rod pou shavir lo bato pou fé zot manir.
Asé viv explwaté par bann gran patron vaza, béké, kak40.
Administrasiyon kom systém kolonial i antrotiyn lo bizness plan.
Mon pép mavouzé, napi la fors siporté.
Mé kombiyn ankor léspri pou mwin dabor.
I gard son dalon ek zilé zonn kom  in kaniar i anpesh ali travay, konsomé.
Ashét ankor la pa sé déplim aou out monay.
Travay ankor pou la po patat.
Kri dann radio out gongon la soufrans plito pran out bâton travers somin pou mét ansanm.
La di bat la min dansé kom si domin zafér va shanzé Laréniyon...
Lév lo pwin ansanm solidér si nou vé galiz somin nou  vé pou nout nasiyon, nout pép.