Mi lé baraz! (Parti 3)

Mi lé pu zilé zonn MI LÉ BARAZ!.
Mi lé baraz kont tout sistém i explwat mon pép.
Mi lé baraz kont tout sistém i explwat mon péï.
Mi lé baraz kont tout out sistém koloni modern.
Mi lé baraz kont ou si ou fé san mwin.
Mi lé baraz kont lékonomi i oubli domounité.
Mi lé baraz kont politikér i fé pa son travay.
Mi lé baraz kont sat i réékri listwar mon péï zis an gou domiél.
Mi lé baraz pou fé détak mon lang napwin lo zo.
Mil lé baraz kont manipulasiyon, dézinformasiyon.
Mi lé baraz kont déstriksiyon, privatizasiyon mon péï.
Mi lé baraz kont formataz léspri i fé krwar in ot manir pa posib'.
Mi lé baraz pou nou arpran viv an réniyoné.
Mi lé baraz pou nou mazinn  viv ansamn pa zis inn à koté lot.
Mi lé baraz pou tir la shénn dann koko, dann, kér, dann pié.
Mi lé baraz pou nou apran ét in pép pa zis in popilasiyon.
Mi lé baraz pou konstruy lavenir nout marmay isi.
Mi lé baraz pou nou trouv manir nouri mon pép.
Mi lé baraz kont sat i mélanz dévlopman ek profitasiyon.
Mi lé baraz pou nou travay shakinn son plas.
Mi lé braz kont rasism i pran tout koulér.
Mi lé baraz pou arét agard mon dalon lot koté lamér si lordinatér.
Mi lé baraz pou fé pou nou avan fé pou touris.
Mi lé baraz kont lalkol i gangrénn anou.
Mi lé baraz kont sat i tap zot fanm, marmay, boug.
Mi lé baraz kont marmay i plér son kaz an panié persé.
Mi lé baraz kont gramoun ni oubli okupé.
Mi lé baraz mi lé pa zilé zonn.
Ranz out zilé  zonn é doviyn out tour baraz chakinn mon bann.
Nou lé baraz, nou lé LaRéniyon.